ТАЛАБАГОНИ ТОҶИК СИНФХОНАҲОЯШОНРО ХУДАШОН ГАРМ МЕКУНАНД

               Душанбе, 23 январ. (АМИТ «Ховар», Людмила Дубинина). — Кормандони «Гурӯҳи ҷавонони муҳофизи муҳити зист» дар доираи барномаи истифодаи захираю имкониятҳои иловагии истифодаи гармӣ дар мактабҳои Хуҷанд, Табошар ва Чкаловск дар мавзӯи гарм кардани синфхонаҳо бо қувваи талабагон силсилаи машғулиятҳо гузаронданд. Ҳадафи асосии ин машғулиятҳо ба талабагон омӯзонидани роҳу усулҳои таъмини ҳарорати мӯътадил дар дохили синфхонаҳо мебошад. Ба талабагон усулҳои оддитарини нигоҳ доштани ҳарорат дар дохили синфхона бо роҳи маҳкам намудани сӯрохиҳои дару тирезаҳо, истифодаи чароғҳои муқаррарии барқии сарфакунандаи қувва ва ғайра омӯзонида шуданд.                Баъди анҷоми машғулиятҳо дар бисёр мактабҳо барои равшан намудани синфхонаҳо чароғҳои сарфакунандаи қувваи барқ насб карда шуданд. Тавре ки маълум аст, чунин чароғҳои барқӣ масрафи қувваи барқро то 70 — 80 фоиз кам мекунанд.                 Рӯзҳои наздик чунин машғулиятҳо дар мактабҳои ноҳияи Қубодиён гузаронида мешаванд.                Роҳбари созмони «Замини хурд» Темур Идрисов ба мухбири АМИТ «Ховар» нақл кард, ки дар ҷараёни машғулиятҳо ба талабагон асбобу анҷом ва предметҳое нишон дода шуданд, ки барои гарм кардани синфхонаҳо истифода бурда мешаванд. Чунин машғулиятҳо дар давоми соли равон дар мактабҳои пойтахт низ гузаронида хоҳанд шуд, гуфт Т.Идрисов.                                                                                                                            Тарҷумон — Қудратов А.