ТОҶИКИСТОНУ МИСР ҲАМКОРИИ ПАРЛУМОНИРО БА РОҲ МЕМОНАНД

                    Душанбе, 26 январ. (АМИТ «Ховар», Марзия Саидова).- Роҳҳои тақвияти ҳамкории мутақобилан судманди Ҷумҳурии Тоҷикистон бо Ҷумҳурии Мисри Араб зимни мулоқоти Раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев бо Вазири ҳамкории байналмилалии Ҷумҳурии Мисри Араб хонум Фоиза Абуннаҷо, ки ҷиҳати иштирок дар ҷаласаи нахустини Комиссияи муштараки иқтисодию тиҷоратӣ ва илмию техникии Тоҷикистону Миср ба Душанбе омадааст, баррасӣ гардиданд.                   Маҳмадсаид Убайдуллоев гуфт, ки ташрифи феълӣ, ки баҳри татбиқи ташаббусҳои созандаи роҳбарони ҳарду давлатҳо оид ба густариши робитаҳои мутақобилан судманди иқтисодию тиҷоратӣ равона гардидааст, дар марҳилаи кунунии муносибатҳо фоли нек аст. Тавассути он имкон фароҳам хоҳад гашт, ки ба ин васила омӯзиши масоили ҳамкориҳои гуногуни ҷавобгӯи ҳадафҳои ҷонибҳо ба таври воқеӣ сурат гирад. М. Убайдуллоев афзуд, ки Маҷлиси миллии Маҷлиси Олии Ҷумҳурии Тоҷикистон дар самти пиёдасозии ҳадафҳои созандаи Роҳбарияти олии мамлакат бо Ҷумҳурии Мисри Араб омода буда, тамоми потенсиали мавҷударо, аз ҷумла барои рушди муносибатҳои байнипарламентӣ равона хоҳад сохт.                    Фоиза Абуннаҷо паёми Раиси Маҷлиси Шӯрои Ҷумҳурии Мисри Араб Сафват аш-Шарифро ба унвонии М. Убайдуллоев ироа карда, гуфт, ки баргузории ҷаласаи Комиссияи муштараки иқтисодию тиҷоратии Тоҷикистону Миср қадами муҳимест дар роҳи тарҳрезии ҳамкориҳои иқтисодӣ, илмӣ ва техникии ҳарду кишвар.                   Ҷонибҳо роҷеъ ба тақвияти ҳамкории байнипарлумонии Тоҷикистону Миср табодули назар карданд. Зикр шуд, ки Тоҷикистон дар доираи ҳамкориҳои байнипарлумонӣ бо созмонҳои ҷаҳонию минтақавии парлумонӣ робитаҳои судмандро бо Маҷлиси Шӯрои Ҷумҳурии Мисри Араб ба роҳ монда, онро густариш хоҳад дод.                   Тибқи иттилои ёвари Раиси Маҷлиси миллии Маҷлиси Олии ҷумҳурӣ Шавкат Саидов, Маҳмадсаид Убайдуллоев ба кори нахустин ҷаласаи Комиссияи муштараки байнидавлатии Тоҷикистону Миср комёбӣ хоста, нақши сулҳофарии Президенти Ҷумҳурии Мисри Араб Ҳусни Муборакро ҷиҳати ҳалли қазияи Фаластину Исроил хирадмандӣ ва иродаи бузурги сиёсӣ арзёбӣ кард.