ТОҶИКИСТОНУ ПОКИСТОН САРМОЯГУЗОРИҲОРО МУТАҚОБИЛАН ҲИМОЯ МЕКУНАНД

          Душанбе, 6 январ.(АМИТ «Ховар», Марзия Саидова).-Лоиҳаи Қонунҳои Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият», «Дар бораи ворид намудани илова ба Кодекси мурофиавии ҷиноии Ҷумҳурии Тоҷикистон», «Дар бораи қабул намудан ва мавриди амал қарор додани  Кодекси мурофиавии ҷиноии Ҷумҳурии Тоҷикистон» аз масъалаҳое буданд, ки дар ҷаласаи навбатии Шӯрои Маҷлиси намояндагони Маҷлиси Олии ҷумҳурӣ баррасӣ гардиданд.         Аъзои Шурои Маҷлиси намояндагон ҳамчунин,  Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ташвиқ ва ҳимояи мутақобилаи  сармоягузориҳоро баррасӣ карданд.      Зимни муҳокимаи масъалаҳои зикршуда, раиси Кумита оид ба энергетика, саноат, сохтмон ва коммуникатсияи Маҷлиси намояндагони Маҷлиси  Олии ҷумҳурӣ Мирзошариф Исломиддинов гуфт, ки  қабули лоиҳаи қонунҳои баррасишуда ҷиҳати  тақвияти волоияти қонун ва рушди иқтисоду тиҷорат, ҷалби инвеститсияҳои хориҷӣ ба кишвар нақши муассир мегузоранд.         Дар фарҷом,  масъалаҳои зикршуда, ҷиҳати баррасӣ ба ҷаласаи навбатии иҷлосияи панҷуми Маҷлиси намояндагони Маҷлиси Олии мамлакат,  даъвати сеюм пешниҳод карда шуданд. Дар ин хусус ба АМИТ «Ховар» сармутахассиси шӯъбаи иттилооти палатаи поёнии парлумони мамлакат Каримҷон Азизов хабар дод.