«ТОҶИКСТАНДАРТ» СОҲИБКОРОНРО МЕОМӮЗАД

                 Душанбе, 23 январ. (АМИТ «Ховар», Бекназари Абӯбакр). — Бо мақсади ба меъёрҳои байналхалқӣ ва стандартҳои ҷаҳонӣ мутобиқ намудан ва баланд бардоштани сатҳу сифати хизматрасониҳо дар давоми соли 2008 Агентии «Тоҷикстандарт» дар якҷоягӣ бо ҶСК «Интурист — Тоҷикистон», Фонди миллии «Шоҳроҳи абрешим» ва мактаби миллии Туризм курсҳои кӯтоҳмуддати «Пешхизмати тарабхона» ва «Корманди меҳмонхона»-ро ташкил карда гузарониданд, ки 133 нафар шунавандагони курсҳои номбурда соҳиби маълумоти касбӣ гардиданд.                Дар Агентии давлатии «Тоҷикстандарт» ба мухбири АМИТ «Ховар» гуфтанд, ки дар асоси талабу дархостҳои соҳибкорон чунин курсҳои кӯтоҳмудат дар назди корхонаҳо низ гузаронида мешаванд. Аз ҷумла, дар назди тарабхонаҳои «Престиж», «Ёқут» ва ошхонаи «Лаззат»-и шаҳри Душанбе чунин омӯзишҳо гузаронида шуда, 35 нафар шунавандагони он баъди супоридани имтиҳон соҳиби сертификати касбӣ гардиданд.                 Ёдовар шудан ба маврид аст, ки дар давоми соли 2008 Агентии «Тоҷистандарт» барои таҷрибаомӯзӣ дар хориҷи кишвар 69 сафар ташкил намуд, ки 26-тои он иштирок дар курсҳои омӯзишӣ буд. Дар ин замина ду нафар мутахассиси шӯъбаи ваколатдиҳӣ дар Ҷумҳурии Қазоқистон курси кӯтоҳмуддати омӯзиши стандартҳои байналмилалиро хатм намуда, соҳиби сертификати байналмилалӣ гардиданд.