ВАЗОРАТИ МАОРИФ ДАСТПАРВАРОНИ ДОНИШКАДАИ ОМӮЗГОРИРО БА СУД ДОДАН МЕХОҲАД

          Душанбе, 19 январ. (АМИТ «Ховар», Людмила Дубинина).- Дар давоми солҳои таҳсили 2007-2008 мактабҳои олии омӯзгории мамлакатро 3600 донишҷӯ хатм кард. Тақрибан 60 фоизи онҳо аз рӯи тақсимот ба мактабҳо фиристода шуданд ва ҳоло аз рӯи ихтисосашон кор мекунанд, гуфт ба мухбири АМИТ «Ховар» сардори раёсати кадрҳои  вазорати маорифи ҷумҳурӣ Шермаҳмад Ёрмаҳмадов.        Донишҷӯёни боқимонда мувофиқи қарори комиссияҳои тақсимот ба мактабҳо фиристода шуда бошанд ҳам, ба маҳалли корашон ҳозир нашуданд ва аз рӯи ихтисос кор намекунанд. Қисми зиёди онҳо барои ба даст овардани маблағи бештар ба  корхонаю муассисаҳои дигар, созмонҳои байналхалқӣ ё ба  мамлакатҳои дигар ба кор мераванд Ҳол он, ки  «Низомномаи тақсимоти донишҷӯён ва  мӯҳлати ибтидоии  фаъолияти онҳо» — ро то ҳол ҳеҷ кас бекор накардааст. Бинобар ин донишҷӯёне, ки баъди хатми донишкада се сол аз рӯи ихтисос кор намекунанд, аз дипломҳояшон маҳрум гардида метавонанд.         Ш.Ёрмаҳмадов зикр кард, ки  вазорат айни ҳол барои ба суд додани чунин донишҷӯён маводи зарурӣ ҷамъ меорад. Мо дастпарварони мактабҳои олиро  водор карданием, ки  ё аз рӯи ихтисосашон кор кунанд ё маблағи хароҷоти барои таҳсили  онҳо сарфшударо ба давлат баргардонанд, гуфт корманди вазорати маориф.