ВКД ХАБАР МЕДИҲАД

               Душанбе, 28 январ. (АМИТ «Ховар» Жасмин Назарова). Тавре ба АМИТ «Ховар» котиби матбуоти Вазорати корҳои дохилии ҶТ Маҳмадулло Асадуллоев иттилоъ дод, аз ҷониби кормандони шуъбаи корҳои дохилии ноҳияи Қубодиёни вилояти Хатлон як далели нигоҳдории маводи нашъаовар ошкор карда шуд. Дар дидбонгоҳи доимамалкунандаи Учқунободи ноҳияи мазкур автомашинаи тамғаи Опел-Астра, рақами давлатиаш Р 49 40 РТ 03 ронандааш Суҳробов Тугмашо, соли таваллудаш 1964 истиқоматкунандаи ноҳияи Ҷ. Румӣ кучаи Карл Маркс, боздошт гардид, ки ҳангоми аз назар гузаронидани бордони он дар халтаи полиэтиленӣ 2 кг 35 гр маводи сахттаъсири навъи героин ва 610 гр маводи нашъадори навъи бангдона дарёфт ва мусодира карда шуд.              Ҳамчунин ҳангоми гузарондани корҳои фаврӣ-ҷустуҷӯӣ дар ноҳияи Спитамен шаҳрванд Раззоқов Абдусалом, соли таваллудаш 1976, сокини ноҳияи Ғончии вилояти Суғд дастгир карда шуд. Аз ӯ ба миқдори 2 кг 970 гр маводи нашъаовари навъи гашиш дарёф ва мусодира карда шуд. Нисбати ин шаҳрвандон бо моддаи 200 қисми 3 Кодекси ҷиноятии ҶТ парвандаи ҷиноӣ кушода шуд.