ЁДНОМАИ АКАДЕМИК АБДУЛҒАНӢ МИРЗОЕВ ДАСТРАСИ ХОНАНДАГОН МЕГАРДАД

            Душанбе, 13 январ. (АМИТ «Ховар», Лутфия Эшонқулова). –  Бахшида ба 100 — солагии зодрӯзи академик Абдулғанӣ Мирзоев ва 50- солагии таъсисёбии Институти шарқшиносӣ ва мероси хаттии АИ Чумҳурии Тоҷикистон китоби «Ёдномаи академик Абдулғанӣ Мирзоев» аз чоп баромад. Маҷмӯа дар нашриёти  «Дониш» нашр гардида,  аз се бахш иборат аст. Дар бахши аввал  чаҳор мақолаи чопнашудаи  муҳаққиқи ховаршиноси шаҳири тоҷик А. Мирзоев, ки доир ба равобити афкори Аҳмади Дониш, Биноӣ ва Абдураҳмони Ҷомӣ маълумот медиҳад, ҷойгир шудааст. Дар бахши дуввум мақолаҳои сирф ихтисосӣ ва фарогири масъалаҳои илмии ховаршиносӣ, забоншиносӣ, фалсафӣ, рӯзноманигорӣ ва фарҳангӣ, ки дар асоси қазоват ва баҳодиҳӣ ба асарҳои бунёдии шарқшиноси тавоно навишта шудаанд ва баъзе масоили илмии ховаршиносии тоҷикро равшан месозанд, оварда шудаанд. Бахши саввум мақолаю хотираҳои ҳамкорону шогирдони устод ва мунаққидонро  дар бар мегирад.