ЮНЕСКО КАЙ РӮЗИ БАЙНАЛМИЛАЛИИ РӮДАКИРО ЭЪЛОН МЕКУНАД?

            Душанбе, 22 январ.(АМИТ «Ховар», Марзия Саидова).-«Бояд аз ҷониби ЮНЕСКО Рӯзи ҷаҳонии Рӯдакӣ муайян карда шавад». Чунин пешниҳод кард зимни суханронии худ раиси Бунёди байналмилалии забони форсӣ- тоҷикӣ Усмон Назир дар ҳамоиши байналмилалии «Рӯдакӣ- падари шеъри форсӣ», ки чанде пеш дар шаҳрҳои Теҳрон ва Машҳади Эрон баргузор шуд.             Дар ҳамоиши мазкур дар қатори 500 донишманд аз 30 давлати ҷаҳон, ҳайати бонуфузи донишмандону муҳаққиқони тоҷик низ иштирок карда, доир ба мақоми Рӯдакӣ ва осори нотакрору ҷовидонаи нобиғаи назми форсӣ табодули назар карданд.            Ҳамчунин, иштирокдорони ҳамоиш эъломия қабул карданд, ки тибқи он минбаъд бо мақсади ҳифзи арзишу осори Одамушшуаро Абӯабдуллоҳи Рӯдакӣ дар кишварҳои форсизабон ва умуман давлатҳое, ки дар онҳо форсизабонҳо умр ба сар мебаранд, мактаби адабии Рӯдакӣ ба роҳ монда шуда, ашъори оламшумули сардафтари адабиёти классикии форсу-тоҷик — Рӯдакӣ омӯзиш ва таҳқиқ мешавад.            Назар ба андешаи донишманди тоҷик Усмон Назир ҳамоиш бахшида ба 1150-солагии Одамушшуаро Абӯабдуллоҳи Рӯдакӣ дар Теҳрон ва Машҳад дар сатҳи баланд баргузор гардида, воқеан «падари шеъри форсӣ» будани Рӯдакиро собит сохт.