ЗАРУРАТИ ТАЪМИНИ РЕҶАВИИ НЕРӮИ БАРҚ ДАР ПОЙТАХТ

               Душанбе, 30 январ.(АМИТ «Ховар», Марзия Саидова).- Шаҳрдории Душанбе муроҷиати ШСХК «Барқи тоҷик»-ро бинобар вазъи ба миён омада дар системаи энергетикии кишвар ва бар асари он пеш омадани зарурати таъмини реҷавии нерӯи барқ ҳамчун тадбири иҷборӣ дар қаламрави пойтахт дастгирӣ намуд.               Бо ин мақсад Қарори дахдори Раиси шаҳри Душанбе ба тасвиб расид, ки дар асоси ҷадвали пешниҳоднамудаи ШСХК «Барқ тоҷик» дар маҳаллаю шаҳракҳои пойтахт то ба эътидол расидани вазъ дар системаи энергетикии кишвар ба истиснои иншоотҳои ҳаётан муҳим ҳамарӯза аз соати 23 то 5-и субҳ интиқоли нерӯи барқ муваққатан қатъ карда мешавад.              Зимнан, роҳбарияти пойтахт аз ҳамаи сокинон, роҳбарони тамоми субъектҳои хоҷагидори пойтахт, иттиҳодияҳои ҷамъиятӣ хоҳиш кард, ки нисбати ин тадбири иҷбории андешидашуда бо ҳусни тафоҳум муносибат намуда, истифодаи сарфакоронаи нерӯи барқро ба роҳ монанд.             Котиби матбуотии Раиси шаҳри Душанбе Шавкат Саидов ба АМИТ «Ховар» иттилоъ дод, ки масъулини шаҳрдорӣ ва раисони ноҳияҳои пойтахт вазифадор карда шуданд, ки корҳои фаҳмондадиҳиро нисбати тадбири андешида муташаккилонаву мақсаднок амалӣ намоянд.