ҲАҶМИ МУОМИЛОТИ ПУЛ БА ВОСИТАИ «ЮНИСТРИМ» ДАР ТОҶИКИСТОН МЕАФЗОЯД

              Душанбе, 20 феврал. АМИТ «Ховар», Темур Бандишоев). — Ҳаҷми муомилоти байналмилалии пул дар Тоҷикистон соли 2008 — ум 58 фоиз афзуда, ба 694 миллион доллари ИМА расид. Ҳол он ки маблағи он соли 2007 ҳамагӣ 439 миллион долларро ташкил медод. Ба ақидаи роҳбарияти системаи байналхалқии ҳаволаи пули «Юнистрим» зиёд гардидани ҳаҷми интиқоли пул натиҷаи фаъолияти самарабахши он дар давоми сол мебошад, ки тамоми минтақаи Осиё, аз ҷумла, Тоҷикистонро фаро мегирад.               Директори генералии «Юнистрим» Сурен Айриён ба мухбири АМИТ «Ховар» гуфт, ки мамлакатҳои Осиё аз ҷиҳати рафту омади мардикорон ба мамлакатҳои дигар на танҳо дар миқёси ИДМ, балки дар тамоми Аврупо нақши муҳим мебозанд. Маълум аст, ки коргарони муҳоҷир дар бозори гардиши пул нақши калон доранд. Бинобар ин, мо барои ба роҳ мондани ҳамкории самарабахш бо муассисаҳои молиявии Тоҷикистон кӯшиш ба харҷ медиҳем.               Мавсуф дар бораи Тоҷикистон сухан ронда, гуфт, ки «Юнистрим», айни ҳол бо ҳамаи бонкҳои калонтарини мамлакат муносибати ҳамкорӣ дорад.              Имрӯз теъдоди бунгоҳҳои хизматрасонии он дар Тоҷикистон аз 500 адад ҳам бештар буда, айни ҳол дар 120 маҳалли аҳолинишини мамлакат фаъолият доранд.