«ҶОМИ ФАҶР» НАСИБИ КӢ МЕГАРДАД?

               Душанбе, 16 феврал.(АМИТ «Ховар», Марзия Саидова).-15 феврал дар толори мини футболи варзишгоҳи марказии Душанбе мусобиқаи дӯстонаи футболбозон таҳти унвони «Ҷоми Фаҷр» оғоз ёфт.              Дар маросими расмии ифтитоҳи мусобиқот Вазири корҳои хориҷии Ҷумҳурии Тоҷикистон Ҳамрохон Зарифӣ ва Сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст иштирок карда, мусобиқоти мазкурро паёми сулҳу дӯстӣ ва ҳамдилию бародарӣ арзёбӣ карданд.                Мусобиқа бо ибтикори Сафорати Ҷумҳурии Исломии Эрон дар Тоҷикистон дар ҳамкорӣ бо Вазорати корҳои хориҷии Ҷумҳурии Тоҷикистон ва Федератсияи футболи Тоҷикистон ташкил карда шуда,он ба 30-умин солагрди Инқилоби исломӣ дар Эрон бахшида шудааст.               Мусобиқа ду ҳафта идома ёфта, дар он 16 даста аз вазорату идораҳои гуногуни Тоҷикистон — Вазоратҳои корҳои хориҷии Тоҷикистон, энергетика ва саноат, нақлиёт ва коммуникатсия, рушди иқтисод ва савдо, Вазорати меҳнат ва ҳифзи иҷтимоии аҳолӣ, Агентии мубориза бо маводи мухаддир, Агентии назорати давлатии молиявӣ ва мубориза бо коррупсия ва Сафоратхонаҳои кишварҳои хориҷии муқими Тоҷикистон — Британияи Кабир, Россия , Туркия, Амрико, Афғонистон, Эрон, Фаронса, Қазоқистон ва ғайра бо ҳам қувва меозмоянд.              Аз Сафорати Эрон дар Душанбе ба АМИТ «Ховар» иттилоъ доданд, ки беҳтарин дастаро «Ҷоми Фаҷр» интизор аст.