БОНКИ ҶАҲОНӢ БА ТОҶИКИСТОН КӮМАК МЕРАСОНАД

                       Душанбе, 18 феврал. (АМИТ «Ховар», Наргис Бояхмедова). — Тибқи паймони ба даст омада, Бонки ҷаҳонӣ ба Тоҷикистон барои дастгирии буҷети давлатӣ ба маблағи 20 миллион доллари ИМА кӯмак мерасонад. Маблағи мазкур барои дастгирии ислоҳоти тадбирҳои сиёсӣ дар соҳаи рушди сектори хусусӣ, идораи сектори давлатӣ ва расондани хизматҳои иҷтимоӣ сарф карда мешавад. Роҳбарияти Бонки ҷаҳонӣ бо хоҳиши Ҳукумати Тоҷикистон маблағи кӯмакро, ки аввалан 10 миллион доллари ИМА муқаррар карда шуда буд, ду баробар зиёд кард. Ҳадафи расондани кӯмаки мазкур бартараф сохтани оқибатҳои бӯҳрони ҷаҳонии молиявию иқтисодӣ дар Тоҷикистон мебошад.                        Кӯмаки мазкур ба роҳбарияти мамлакат имкон медиҳад, ки вазъи босуботи макроиқтисодиро беҳтар сохта, тартиби додани иҷозатномаҳоро барои фаъолияти соҳибкорию тиҷоратӣ такмил дода, тартиби тафтиши фаъолияти корхонаҳоро беҳтар намуда, ҷараёни хусусӣ гардондани корхонаҳоро бештар шаффоф намуда, ба тақвияти рақобати солим дар бозор мусоидат намуда, заминаи меъёрию қонунии соҳаҳои ҳавонавардӣ, энергетика ва ғайраро такмил диҳад. Дар ин бора аз намояндагии Бонки ҷаҳонӣ дар Тоҷикистон ба АМИТ «Ховар» хабар доданд.                                                                                                                                                  Тарҷумон — Қудратов А