ДАР ҲУКУМАТИ ҶУМҲУРӢ СОЗИШНОМА БА ИМЗО РАСИД

                  Душанбе, 12-ми феврал. (АМИТ«Ховар», Наргис Бойаҳмадова). — 12 феврал Созишномаи генералии байни Ҳукумати Ҷумҳурии Тоҷикистон, Иттиҳодияҳои корфармоёни Тоҷикистон ва Федератсияи иттифоқҳои касабаи мустақили Тоҷикистон барои солҳои 2009-2011 ба имзо расид, ки онро аз ҷониби Ҳукумати Ҷумҳурии Тоҷикистон Сарвазири мамлакат Оқил Оқилов, аз ҷониби Иттиҳодияи корфармоёни ҷумҳурӣ Ш.Азизбек ва аз ҷониби Федератсияи иттифоқҳои касабаи Тоҷикистон С.Муродалӣ имзо карданд.                  Аз Хадамоти матбуоти Сарвари давлат ба АМИТ «Ховар» иттилоъ доданд, ки пас аз анҷоми маросими баимзорасии созишномаи мазкур О. Оқилов ин созишномаро сатҳи олии ҳамкории байни давлат, корфармоёну кормандон дар шахси намояндаи онҳо ва иттифоқҳои касаба арзёбӣ карда, афзуд, ки дар баробари ин, созишнома тарзи шарномавии танзими муносибатҳои иҷтимоию меҳнатиро ифода карда, яке аз воситаҳои таъмини суботи иҷтимоӣ дар шароити бозори озод аст.                  «Ин гуна ҳамкорӣ ба ҳалли бисёр проблемаҳои иҷтимоӣ, аз қабили пардохти музди меҳнат, таъсиси ҷойҳои нави корӣ ва таъмини кафолатҳои меҳнатию иҷтимоии кормандони кироя мусоидат мекунад», — тазаккур дод О. Оқилов.