ДАР ВОСЕЪ МАКТАБҲОИ НАВ БУНЁД МЕЁБАНД

                   Восеъ, 18 феврал. (АМИТ «Ховар», Сулаймон Холов).-Дар ноҳияи Восеъ ду мактаби нав, ки бо таври ҳашар сохта шудаанд, ба истифода дода шуданд. Ин маткабҳои рақами 66 ва 67 мебошанд, ки то ин замон хонандагон дар хонаҳои шахсӣ илм меомӯхтанд.                   Мудири шӯъбаи маорифи ноҳияи Восеъ Давлат Шарипов иброз дошт, ки дар сохтмони мактабҳои мазкур 180 ҳазор сомонӣ сарф шудааст. Ин мактабҳо бо тамоми таҷҳизотҳои лозимаи хониш муҷаҳҳаз гардонида шуданд. Ба гуфти ин манбаъ тӯли соли 2008 аз ҳисоби буҷаи маҳаллӣ 82700 сомонӣ, аз ҳисоби волидайн 110 ҳазор сомонӣ, аз ҳисоби буҷети вилояти 186 ҳазору 500 сомонӣ, буҷаи ҷумҳуриявӣ 1 миллиону 100 ҳазор сомонӣ, азҳисоби Вазорати маориф барои таъмири асосии мактаби рақами №28, 98 ҳазор сомонӣ маблағгузорӣ гардид.                 Д.Шарипов афзуд, ки соли моҳи апрели соли ҷорӣ бо маблағгузории Вазорати маориф дар маркази шаҳрак як мактаби 2 ошёна барои 200 хонанда ва аз ҳисоби буҷаи вилоятӣ 2 мактаб дар деҳаҳои Собқодирӣ ва Пушиёни боло сохта мешавад.