ДУШАНБЕ БАҲОРРО БО АВТОБУСҲОИ НАВ ИСТИҚБОЛ МЕГИРАД

                   Душанбе, 27 феврл.(АМИТ «Ховар», Марзия Саидова).-Дар моҳи март 150 адад автобусҳои нави тамғаи «ПАЗ» дар роҳҳои пойтахт ба ҳаракат дароварда мешаванд.                   Муовини Раиси шаҳри Душанбе Абдуҳомид Шералиев зимни сӯҳбат ба хабарнигори АМИТ «Ховар» гуфт, ки автобусҳои тамғаи «ПАЗ», ки алҳол 134 адади он вориди пойтахт шудаанд, дар асоси шартномаи байни Мақомоти иҷроияи ҳокимияти давлатии шаҳри Душанбе бо корхонаи «Русский Автобус»-и Федератсияи Русия ба Душанбе оварда шудаанд ва рӯзҳои наздик 16 адади дигари он ба Душанбе ворид карда мешаванд. Автобусҳои нав баъди ба расмиятдарорӣ пурра дар хатсайрҳои пойтахт ба мусофирон хизмат мерасонанд. Автобусҳо аз лиҳози техникӣ мусоид ба шароити роҳҳои пойтахт буда, 75 адади он аз сӯзишвории дизелӣ ва 75 адади дигараш аз бензин ва гази моеъ истифода мекунанд.                   Абдуҳомид Шералиев мегӯяд, ки алҳол ба мусофирон дар пойтахт беш аз 500 автобусу троллейбусҳои корхонаҳои коммуналии мусофиркашонии пойтахт дар 72 хатсайр хизмат мерасонанд.