Э. РАҲМОН : «МАРҲАЛАИ НАВИ МУНОСИБАТҲОИ ҶТ ЯМАН ОҒОЗ МЕЁБАД»

                Душанбе, 27 феврал. АМИТ «Ховар», Темур Бандишоев). — Президенти Ҷумҳурии Тоҷикистон Эмомалӣ Раҳмон имрӯз зимни ифтитоҳи гуфтушуниди ҳайатҳои расмии Тоҷикистону Яман зикр намуд, ки муносибатҳои ҳар ду мамлакат таърихи тӯлонӣ дорад ва имрӯз марҳалаи нави муносибатҳои онҳо оғоз меёбад.               Мухбири АМИТ «Ховар» хабар медиҳад, ки дар фарҷоми гуфтушунид Изҳороти муштараки Тоҷикистону Яман дар бораи равнақу ривоҷи муносибатҳои дӯстона ва ҳамкорӣ ва Созишномаи ҳамкории вазорати тандурустии Ҷумҳурии Тоҷикистон ва вазорати тандурустию нуфуси Ҷумҳурии Яман имзо шуданд.                Баъдан сарони ҳар ду давлат барои намояндагони воситаҳои ахбори оммавӣ нишасти матбуотӣ ташкил намуданд. Дар он таъкид шуд, ки ҳар ду ҷониб дар бораи ташкили комиссияи муштарак паймон карданд. Комиссияи мазкур тадбирҳои густариши ҳамкории ҳар ду мамлакатро дар соҳаҳои гуногун ҳамоҳанг месозад.               Президенти Яман Алӣ Абдулло Солеҳ дар ҷараёни нишасти матбуотӣ изҳор намуд, ки мамлакаташ ҳуҷуми ваҳшиёнаи Исроилро ба Фаластин қатъан маҳкум менамояд. Вай изҳор намуд, ки проблемаи Фаластин бояд бо роҳҳои мусолиматомез ҳал карда шавад.               Президенти Яман имрӯз ба шаҳри Норак рафта, бо фаъолияти Нерӯгоҳи барқи обии Норак шинос мегардад.  Меҳмони олиқадр пагоҳ, 28 январ бо раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев ва Сарвазир Оқил Оқилов мулоқот хоҳад кард.                                                                                                                                          Тарҷумон — Қудратов А