ФАРМОНИ ПРЕЗИДЕНТРО ТАРАФДОРЕМ

                Душанбе, 13 феврал. (АМИТ «Ховар», Лаззат Диловарзод).- Фармони Президенти Ҷумҳурии Тоҷикистон Эмомалӣ Раҳмон «Дар бораи вокуниши шахсони мансабдор ба маводҳои танқидӣ ва таҳлилии васоити ахбори омма» ифодагари рушди матбуот, озодии сухан ва беҳтар гардидани фазои иттилоотии кишвар мебошад. Мақсади Сарвари давлат тавассути васоити ахбори омма ошно намудани ахолӣ ба кори вазорату идораҳо, кумитаю корхонаҳо, мақомоти иҷроияи маҳаллии ҳокимияти давлатӣ аз раванди демократикунонии ҷомеа дар давлати демократӣ мебошад.                 Роҳбарият ва кормандони Кумитаи андози назди Ҳукумати Ҷумҳурии Тоҷикистон ин фармонро ҳамчун дастур мавриди амал қарор медиҳанд. Дар Кумитаи андоз натиҷаи фаъолият дар ҳар се моҳ бо иштироки васеи намояндагони васоити ахбори оммаи кишвар ва хориҷи он мавриди таҳлили ҳаматарафа қарор мегирад. Дар нишастҳои матбуотӣ ба суолҳои рӯзноманигорон дар мавриди сарчашма ва ҷамъоварии андозҳо, мушкилот ва роҳҳои бартараф сохтани оҷилии он ҷавобҳои далелнок дода мешавад.                Вазорату идораҳо ҷонибдори онанд, ки матолиби таҳлилию танқидӣ профессионалӣ, беғараз ва созанда бошанд. Роҳҳои ҳалли мушкилот оқилона пешниҳод карда шаванд, далелҳои таҳлилию танқидӣ ҳаматарафа асоснок гарданд.                — «Танҳо дар ҳамин сурат шароит муҳайё мегардад, ки ҳамкории мутақобилан судманди кормандони васоити ахбори оммаю вазорату кумитаҳо, идора ва мақомоти иҷроияи маҳаллии ҳокимияти давлатӣ оқилонаю барои тарафайн манфиатбахш ба роҳ монда шавад»,- иброз намуд раиси Кумитаи андози назди Ҳукумати ҷумҳурӣ Нусратулло Давлатов ба мухбири АМИТ «Ховар».