ХИШТИ НАХУСТИНИ МАРКАЗИ ТИҶОРАТИИ ЭРОН ГУЗОШТА ШУД

                 Душанбе, 6 феврал. (АМИТ «Ховар», Марзия Саидова).-Дар шаҳри Душанбе аз ҷониби вазири бозаргонии Ҷумҳурии Исломии Эрон Сайидмасъуди Миркозимӣ хишти нахустини пойдевори Маркази тиҷорат ва намоишгоҳи Эрон гузошта шуд, ки он метавонад ба рушди иқтисоду тиҷорат байни ду кишвари ҳамзабон нақши муассир гузорад.                  Гузоштани хишти нахустини Маркази мазкурро вазири бозаргонии Эрон саҳифаи наве дар тавсеаи муносибатҳои мутақобилан судманди иқтисодии Тоҷикистону Эрон арзёбӣ кард. Сайидмасъуди Миркозимӣ гуфт, ки Маркази тиҷоратӣ ва намоишгоҳи Эрон аз ҷониби бахши хусусии Эрон сохта мешавад. Барои дар кӯтоҳтарин вақт сохтани он Вазорати бозаргонии Эрон низ як субсидеро кӯмак менамояд. Маркази тиҷорат ва намоишгоҳи Эрон дар хиёбони Саъдии Шерозии Душанбе дар масоҳати 0,5 гектар сохта мешавад. Алҳол дар ин самт аз ҷониби мутахассисони эронӣ корҳои лоиҳакашӣ идома дорад.                 Ба андешаи вазири бозаргонии Эрон Маркази мазкур маҳалле мешавад, ки дар он доираҳои тиҷоратӣ ва бозаргонҳои тоҷику эронӣ бо ҳам вохӯрию мулоқот намуда, бо фаъолияти якдигар шинос мешаванд ва тавофуқномаҳои ҳамкорӣ дар соҳахои гуногун ба имзо мерасонанд. Ҳамзамон, имкон доранд, ки дар ин Марказ намунаи молҳояшонро ба намоиш гузоранд ва муаррифӣ созанд, ки ин ба тавсеаи тиҷорати байни ду кишвар мусоидат менамояд.