ИНТИҚОЛИ МАБЛАҒИ МУҲОҶИРОНИ МЕҲНАТӢ 50 ФОИЗ КОҲИШ МЕЁБАД

                       Душанбе, 7 феврал. (АМИТ «Ховар», Лаззат Диловарзод).-Бонки Ҷаҳонӣ тавассути расонаҳои дохилу хориҷи кишвари Тоҷикистон иттилоъ додаст, ки интиқоли маблағҳои муҳоҷирони меҳнатӣ ба се кишвари Осиёи Миёна; Тоҷикистон,Ӯзбекистон ва Қирғизистон бо сабаби паёмадҳои бӯҳрони молиявии ҷаҳонӣ 50 фоиз кам мешавад.                        Тибқи маълумоти расмӣ ҳар сол ба Ҷумҳурии Тоҷикистон тавассути бонкҳо беш аз 2 миллиард доллар ворид мешуд. Дар 4 моҳи охир воридоти асъори хориҷӣ ба Ҷумҳурии Тоҷикистон бо сабаби бӯҳрони молиявии ҷаҳонӣ дар Русия ва Қазоқистон 120 миллион доллар кам шуд, зеро муҳоҷирони тоҷик дар ин ҷо барои худ кор пайдо карда наметавонанд ва ё аз кор барканор карда шудаанд. Панҷоҳ фоиз кам шудани интиқоли асъори хориҷӣ вазорату идораҳои ҷумҳуриро водор месозад, ки дар таъмини аҳолии кишвар бо маводи зарурии ниёзи аввал тадбирҳои судманд андешанд.