КӮМАК БА ФАЪОЛИЯТИ ҶАМОАТҲОИ ДЕҲОТ

                 Душанбе, 17 феврал. (АМИТ «Ховар», Лаззат Диловарзод).- Бино ба иттилои дастгоҳи раиси шаҳри Ваҳдат, мақомоти иҷроияи маҳаллии ҳокимияти давлатии шаҳр бо мақсади беҳбудӣ бахшидани кори ҷамоатҳо чорабиниҳои зарурӣ, аз қабили гузаронидани маҷлисҳои назоратӣ, санҷишҳои ҳолати коргузорию ҳуҷҷатнигорӣ, доир намудани семинару машваратҳои омӯзишӣ ва аз аттестатсия гузаштани роҳбарону кормандони онҳоро амалӣ намуд. Ин чорабинӣ боиси беҳтар гардидани фаъолияти ҷамоатҳои деҳот гардид.                 Аз тарафи роҳбарияти ноҳия бо иштироки раисони ҷамоатҳо 64 маротиба маҷлисҳои назоратӣ доир гардида, дар он ҷаласаҳо масъалаҳои иҷрои амру фармон, ободонии деҳаҳо, кабудизоркунии шоҳроҳҳо, танзими ҷашну маросимҳо ва зимистонгузаронии муассисаҳои соҳаи тиб ва маориф баррасӣ гардид, ки он ба фаъолияти ҷамоатҳои деҳот мусоидат намуд.