КОНФРОНСИ ИЛМӢ БАХШИДА БА СОЛГАРДИ ИНҚИЛОБИ ИСЛОМИИ ЭРОН

                       Хуҷанд, 9 феврал. АМИТ «Ховар», Санавбар Мақсудова ). — Дар шаҳри Хуҷанд бахшида ба 30- солагии Инқилоби исломии Эрон конфронси илмӣ баргузор гардид. Дар конфронс сафири кабири Эрон дар Тоҷикистон Алиасғари Шеърдӯст, намояндагони мақомоти ҳокимияти давлатии маҳаллӣ, созмонҳои ҷамъиятӣ ва зиёиён иштирок намуданд. Иштирокчиёни конфронс дар бораи аҳамияти Инқилоби исломӣ дар Эрон ва густариши муносибатҳои тиҷоратию иқтисодии Тоҷикистону Эрон сухан ронданд.                       Мухбири АМИТ «Ховар» хабар медиҳад, ки сафири Эрон қабл аз конфронс дар маросими ифтитоҳи Маркази иттилооти иқтисодии Эрон дар шаҳри Хуҷанд ширкат варзид. Сафир дар ин ҷо бо намояндагони воситаҳои ахбори оммавӣ сӯҳбат орост. Зимни сӯҳбат сухан дар бораи мулоқоти сафир бо раиси вилояти Суғд Қоҳир Расулзода ва нақшаҳои густариши муносибатҳои Тоҷикистону Эрон рафт.                        Алиасғари Шеърдӯст изҳор намуд, ки оянда дар вилояти Суғд кушодани намояндагии Сафорати Эрон ба нақша гирифта шудааст. Инчунин, дар байни шаҳри Хуҷанд ва яке аз шаҳрҳои калонтарини Эрон роҳи ҳавоӣ кушода хоҳад шуд. Барои ин ҳамаи имкониятҳо мавҷуданд. Баъди мустақил гардидани Тоҷикистон байни мамлакатҳои мо бештар аз 170 ҳуҷҷати ҳамкорӣ имзо шудааст, гуфт сафир.