«МАНАС» БА РОССИЯ ГАРОН АФТОД

               Душанбе, 24 феврал. (АМИТ «Ховар», Лаззат Диловарзод).- Муваффақияти сиёсати хориҷии Россияро дар ибтидои соли 2009 аз изҳороти президенти Ҷумҳурии Қирғизистон Қурмонбек Боқиев дар хусуси қатъ кардани шартнома оид ба истифодаи пойгоҳи низомии «Манас» бо Амрико баҳо бояд дод. Аммо чунон ки маълум шуд, ин «дастовард» дар сиёсати хориҷӣ барои Россия то дараҷае гарон афтод. Барои чунин амали «ҷасурона»-и Бишкек Федератсияи Россия розӣ шуд, ки барои сохтмони нерӯгоҳи барқи обии «Қамбарота»-и Ҷумҳурии Қирғизистон 1,7 миллиард доллари амрикоӣ сармоя пешниҳод намояд. Россия ҳамчунин то 30-юми апрел ӯҳдадор шудааст, ки барои 20 сол дар ҳаҷми 300 миллион доллар ба Ҷумҳурии Қирғизистон қарзи бефоиз ҷудо намояд. Ҷумҳурии Қирғизистон пардохти қарзи пешбинишударо дар давоми солҳои 2016- 2049 амалӣ менамояд.                Дигар шудани самти сиёсати давлати абарқудрате чун Россия, ки дар вохӯрии Дмитрий Медведов дар Тошкент бо ҳамтои худ Ислом Каримов оид ба ихтилофи Тошкент бо ду давлати ҳамсояи болообаш дар сохтмони нерӯгоҳҳои барқи обӣ тарафдорӣ ёфт, то ҷое боварии дигареро дар бораи ваъдаи 1,7 миллиард доллари амрикоӣ барои сохтмони нерӯгоҳи «Қамбарота» зери суол қарор медиҳад.