МУҲОКИМАИ ПРОБЛЕМАҲОИ ТАҒЙИР ЁФТАНИ ИҚЛИМ

                    Душанбе, 11 феврал. АМИТ «Ховар», Людмила Дубинина). — 27 феврал дар Душанбе дар мавзӯи «Ҳалли проблемаҳои тағйир ёфтани иқлим ва ҷалби ҷомеа ба онҳо» конфронси миллӣ баргузор мегардад. Конфронс бо ташаббуси Маркази экологии ҷавонон ва Созмони ташкилотҳои ҷамъиятии экологӣ гузаронида мешавад.                   Директори Маркази экологии ҷавонони ҷумҳурӣ Юрий Скочилов ба мухбири АМИТ «Ховар» хабар дод, ки ҳадафи асосии конфронс огоҳ сохтани ҷомеа аз оқибатҳои гармшавии иқлим ва қабули қарорҳо барои пешгирии ин зуҳуроти номатлуб дар замони ҳозира, ошкор сохтани ҷиҳатҳои муҳимтарини проблема ва таъсири он ба иқтисодиёти мамлакат мебошад.                  Тибқи нақша, дар конфронс бештар аз 40 намояндаи мақомоти ҳокимияти давлатӣ, Кумитаи ҳолатҳои фавқулодда ва мудофиаи шаҳрвандӣ, вазорату идораҳои тандурустӣ, таъминоти иҷтимоӣ, созмонҳои ҷамъиятӣ ва соҳибкорону тоҷирон ширкат меварзанд. Дар конфронс роҳу усулҳои амалӣ сохтани барномаи СММ барои пешгирии оқибатҳои тағйироти иқлим ва протоколи Киото дар ин масъала муҳокима карда, вобаста ба шароиту имкониятҳои Тоҷикистон тавсияҳо қабул карда мешаванд.                 Мухбири АМИТ «Ховар» хабар медиҳад, ки дар гузаронидани конфронс намояндаи шабакаи иқлимшиносии мамлакатҳои Аврупои шарқӣ, Қафқоз ва Осиёи Марказӣ Ирина Ставчук, ҳамоҳангсози муассисаи СММ дар масъалаи тағйироти иқлим Бекмурод Маҳмадалиев ва созмони хайрияи «Акт Централ Азия» кӯмак мерасонанд.