МУНОСИБАТҲОИ ИҚТИСОДИИ ТОҶИКИСТОНУ ЭРОН БО СУРЪАТ АФЗОИШ МЕЁБАНД

                    Душанбе, 5 феврал. (АМИТ «Ховар», Покиза Маҳмадбекова). — Дар Вазорати рушди иқтисод ва савдои ҷумҳурӣ мулоқот байни вазири рушди иқтисод ва савдои Ҷумҳурии Тоҷикистон Ғуломҷон Бобозода ва вазири бозоргонии Ҷумҳурии Исломиии Эрон Сайидмасъуд Миркозимӣ баргузор гардид. Зимни мулоқот тарафҳо изҳор доштанд, ки дар соли 2008 муомилоти мол байни ин ду кишвари ҳамзабон 216,2 миллион доллари амрикоиро ташкил дод. Ин нишондиҳанда нисбат ба соли 2007 якчанд маротиба зиёд аст.                    Ҳамчунин зикр гардид, ки соли гузашта Ҷумҳурии Тоҷикистон ба Ҷумҳурии Исломии Эрон 23 ҳазор тонна алюминий ва 21,4 ҳазор тонна нахи пахта, ба қадри зиёд пилла ва меваю сабзавот содир намуд. Аз Эрон ба кишвари Тоҷикистон бошад маводи сӯхт, маводи хӯрока, аз ҷумла равғани растанӣ, гандум, тухми мурғ, гӯшт, шакар ва инчунин кӯмакҳои башардӯстона ворид гардид.                  Бояд гуфт, ки дар Тоҷикистон дар давоми соли 2008 якчанд намоишгоҳи молу таҷҳизоти ширкатҳои мухталифи Эрон баргузор гардид. Бо ҳамкории мутахассисони Ҷумҳурии Исломии Эрон дар Ҷумҳурии Тоҷикистон бунёди чандин иншооти муҳим идома дорад, ки Нақби «Истиқлол» дар байни онҳо мавқеи хос дорад.                  Имрӯзҳо дар нерӯгоҳи барқии обии «Сангтӯда 2» корҳои сохтмону васлкунӣ идома дошта, сохтмони роҳҳои автомобилӣ, роҳи оҳан, хати интиқоли барқ ва амсоли инҳо дар ояндаи наздик дар назар аст.