МУРОҶИАТНОМАИ ФИКМ ВА ШӮРОИ ВЕТЕРАНҲО БА ИШТИРОКЧИЁНИ ҶБВ ВА СОБИ&#117

                  Душанбе, 6 феврал. АМИТ «Ховар», Кристина Эрлих). — Дар маҷлиси Кумитаи иҷроияи Шӯрои генералии Федератсияи иттифоқҳои касабаи мустақили Тоҷикистон ва Шӯрои ветеранҳои ҷумҳурӣ вобаста ба тайёрӣ ба 65 — солагии ғалаба дар Ҷанги Бузурги Ватании солҳои 1941 — 1945 ба унвони иштирокчиён, ветеранҳои ҷанг, собиқадорони меҳнат ва ташкилотҳои иттифоқи касаба муроҷиатнома қабул карда шуд. Муроҷиатномаи мазкур дар доираи Қарори Ҳукумати ҷумҳурӣ аз 23 октябри соли 2008 «Роҷеъ ба соли ветеранҳои ҶБВ эълон намудани соли 2010» қабул гардид. Дар робита Кумитаи тадорукот ва барномаи тайёрӣ ба ҷашни 65 — солагии ғалаба дар ҶБВ ташкил карда мешаванд.                  Дар муроҷиатнома воситаҳои ахбори оммавии иттифоқҳои касаба вазифадор карда шудаанд, ки ҳақиқати таърихиро дар бораи ҷанг ҳамаҷониба инъикос намуда, дар бораи корнамоию қаҳрамонии намояндагони Тоҷикистон дар муҳорибаҳои ҶБВ хабару мақолаҳо чоп карда, ба муносибати 65 — солагии ғалаба дар ҷанг тадбирҳо андешида, кӯшишҳои таҳрифи натиҷаҳои Ҷанги Бузурги Ватаниро пешгирӣ намоянд. Дар маҷлис зикр шуд, ки айни ҳол дар қисми зиёди мамлакатҳои ИДМ ба ҷашни ғалаба тайёрӣ дида мешавад.                  Дар Тоҷикистон ҳам ба ин муносибат гузаронидани тадбирҳои гуногуни тантанавӣ пешбинӣ карда, барои ҳифзи иҷтимоии иштирокчиён ва маъюбони ҷанг, заҳматкашони ақибгоҳ ва оилаҳои аскарону афсарони ҳалокшуда, инчунин, абадӣ гардонидани хотираи ҳомиёни ватан чораҳо андешида хоҳанд шуд.                Дар муроҷиатнома ба зиёд кардани маблағи нафақаи иштирокчиёну ветеранҳои ҷанг, нигоҳ доштани имтиёзу кафолатҳои дар Созишномаи генералии Ҳукумати Ҷумҳурии Тоҷикистон, Иттиҳоди соҳибкорон ва Федератсияи иттифоқҳои касабаи мустақили Тоҷикистон пешбинишуда диққати махсус дода мешавад.                                                                                                                                Тарҷумон — Қудратов А.