НАМОИШГОҲИ “ПРОДЭКСПО-2009” ДАР ШАҲРИ МОСКВА БА КОРИ ХУД ОҒОЗ КАРД

                 Душанбе, 9 февраля. (АМИТ "Ховар", Покиза Маҳмадбекова). — Панҷ корхонаи коркарди мева ва сабзавоти Ҷумҳурии Тоҷикистон дар намоишгоҳи байналмиллалии саноатӣ хӯрокворӣ ва нӯшока "ПродЭкспо-2009", ки 9 феврал дар шаҳри Маскав шурӯъ шуд, аз ин кишвар намояндагӣ мекунанд. Ин корхонаҳо "Шарбатҳо" ва "Иттиҳодияи илмӣ-истеҳсолӣ" (собиқ Гули Кӯҳсор") аз шаҳри Душанбе ва "Корхонаи консервбарории Ҳасанов", "Элита-Истаравшан", ва "Тоҷфрут" аз вилояти Суғд мебошанд.                 Роҳбари лоиҳаи «Дастгирии соҳибкории хурду миёна дар Тоҷикистон» (GTZ) Маттиас Ҳалдер дар сӯҳбат ба мухбири АМИТ "Ховар", гуфт, ки ин намоишгоҳ барои корхонаҳои Тоҷикистон як имконияти хубест, то маҳсулоти худро ба доираи васеъи истеъмолкунандагон дар Русия, Аврупои Шарқӣ ва Ғарбӣ нишон бидиҳанд. Ба қавли ӯ, ин намоишгоҳ имкон медиҳад, то корхонаҳои Тоҷикистон бо ширкатҳои хориҷӣ робитаҳои мутақобилан судманд барқарор намоянд. Аз ҷониби корхонаҳои Тоҷикистон намудҳои гуногуни маҳсулот барои намоишгоҳ омода шудааст.                Аз рӯи иттилои роҳбари лоиҳаи Маркази байнулмилалии тиҷорат дар Тоҷикистон Саидмӯъмин Камолов, Намоишгоҳи мазкур ба корхонаҳои Тоҷикистон имкони воқеъии пешбурди тиҷорати худ дар бозорҳои беруна, дарёфти шарикони нави тиҷоратӣ ва роҳҳои нави фурӯшро фароҳам меорад.                Бояд гуфт, ки шонздаҳумин намоишгоҳи байнулмилалии саноати хӯрока ва нӯшока "ПродЭкспо-2009" то 13 феврал идома ёфта, бо мусоидати ҳукумати шаҳри Маскав ва Палатаи тиҷорат ва саноати Русия баргузор мегардад. Иштироки корхонаҳои Тоҷикистон дар бузургтарин намоишгоҳи маҳсулоти хӯрока дар ҳудуди собиқ Шӯравӣ бо кӯмаки молӣ ва фаннии Оҷонсии олмонии ҳамкории фаннӣ (GTZ) ва Маркази байнулмилалии тиҷорат (ITC) имконпазир гардидааст.