НАШЪАҶАЛОБ БА МАҚСАД НАРАСИД

                   Душанбе, 27 феврал. (АМИТ «Ховар»).- Кормандони гумруки майдони ҳавоии Раёсати гумрукӣ шаҳри Душанбе 20-уми феврали соли ҷорӣ ҳангоми барасмиятдарорӣ ва назорати гумрукии мусофирони ҳавопаймои Душанбе-Новосибирск истиқоматкунандаи ноҳияи Қумсангир, Саодат Ҳакимоваро дастгир намуданд. Вай ба дар интиқоли ғайриқонунии маводи нашъаовар тавассути сарҳади гумрукии Ҷумҳурии Тоҷикистон гумонбар дониста мешавад.                  Зимни азназаргузаронӣ аз бадани ӯ 29 бастаи селофании дорои маводи нашъаовар дарёфт карда шуд, ки номбурда мехост ба таври пинҳонӣ ба Федератсияи Русия барад.                  Мутобиқи хулосаи ташхиси лабароторӣ хокаи маводи нашъаовари дарёфтшуда героин буда, вазни холиси он 269,6 грамро ташкил медиҳад.                  Бо назардошти далелҳои зикргардида ва мувофиқи моддаҳои 32 қисми-3, 200 қисми-3 Б В Г ва 289 қисми 2-и Кодекси ҷиноии Ҷумҳурии Тоҷикистон нисбати Саодат Ҳакимова парвандаи ҷиноятӣ оғоз гардида, ба Прокуратураи нақлиётӣ фиристода шуд.