НАВРӮЗИ ДУШАНБЕ ТАҶАССУМГАРИ ФАРҲАНГИ ОРИЁИСТ

                  Душанбе, 28 феврал.(АМИТ «Ховар», Марзия Саидова).-Ҷашни миллии тоҷикон -Наврӯзи ҳуҷастапай дар Душанбе 21 март дар Варзишгоҳи марказӣ ва атрофи Кӯли ҷавонону Кохи Борбад бо фарогири намоиши ҳунарҳои мардумӣ, ки таҷассумгари фарҳанги оламшумули мардумони ориёианд, баргузор мешавад.                  Масъалаи омодагии наврӯзи Душанбе дар Мақомоти иҷроияи маҳаллии ҳокимияти давлатӣ дар шаҳри Душанбе, ки таҳти раёсати Раиси шаҳри Душанбе Маҳмадсаид Убайдуллоев баргузор шуд баррасӣ гардид.                  Коргардони базми наврӯзи Душанбе яке аз ҳунармандони шинохтаи ҷумҳурӣ, Убайдулло Раҷабов мебошад.                   Наврӯзи фархундапайро бидуни чорбиниҳои варзишӣ тасаввур кардан номумкин аст.Аз ин рӯ, 22 март дар Варзишгоҳи марказӣ чорабинии варзишии гӯштини миллӣ баргузор мегардад. Ҳамзамон тибқи иттилои котиби матбуотии Раиси шаҳри Душанбе Шавкат Саидов, дар тамоми боғҳои фарҳангу фароғатӣ ва шаҳраку маҳаллаҳои пойтахт сайругашти оммавӣ сурат мегирад.