ОҒОЗИ ЯРМАРКАИ ФУРЎШИ НИҲОЛҲО, КЎЧАТИ ГУЛҲО ВА ТУХМИ ЗИРОАТҲО

                  Душанбе, 18 феврал. (АМИТ «Ховар» Жасмин Назарова). Вазорати кишоварзии Ҷумҳурии Тоҷикистон бо мақсади амалӣ намудани қарори Ҳукумати Ҷумҳурии Тоҷикистон дар бораи «Барномаи барқарорсозӣ ва рушди минбаъдаи соҳаи боғу токпарварӣ дар ҷумҳурӣ барои солҳои 2005-2010» ва барои боз ҳам ободу зебо намудани боғу гулгаштҳо ва хиёбонҳо, 28 феврали соли 2009 дар боғи «Дустии халқҳо»-и шаҳри Душанбе ярмаркаи фурўши ниҳолҳо, кўчати гулҳо ва тухмии зироатҳои хушсифатро баргузор мекунад.                 Барои омодагӣ ва дар сатҳи баланд гузаронидани ярмарка дар вазорат гуруҳи корӣ таҳти роҳбарии бевоситаи муовини вазир Ш. Раҳимназаров таъсис дода шудааст.                Дар ярмарка Корхонаи воҳиди ҷумҳуриявии хоҷагиҳои ниҳолпарвари «Тоҷикниҳолпарвар», Корхонаи воҳиди давлатии «Навъҳои тухмии сабзавоти Тоҷикистон», кишоварзони вилоятҳо ва шаҳру навоҳии ҷумҳурӣ ниҳолҳои гуногуни мевадиҳандаю сояафкан, кўчати гулу буттаҳо ва тухмиҳои баландсифатро пешкаши харидорон мегардонанд.                  Бо дастгирии раёсатҳои кишоварзии вилоятҳои Суғд, Хатлон ва ноҳияҳои тобеи марказ дар маркази вилоятҳо, шаҳру ноҳияҳо низ чунин ярмарка — фурўши ниҳолҳо гузаронида мешавад.