О. ОҚИЛОВ: «МО ҲАВАСМАНДЕМ…

               КИ ОЛМОН ДАР ТАТБИҚИ ЛОИҲАҲОИ ЭНЕРГЕТИКИИ ТОҶИКИСТОН САҲМИ МУНОСИБ ДОШТА БОШАД»              Душанбе, 14-ми феврал. (НИАТ «Ховар», Наргис Бояхмедова). — Таҳкими муносибатҳои Тоҷикистону Олмон дар соҳаҳои иқтисод, энергетика, маориф, тандурустӣ ва туризм 13 феврал дар ҷараёни мулоқоти Сарвазири Ҷумҳурии Тоҷикистон Оқил Оқилов ва Сафири фавқуллода ва мухтори Ҷумҳурии Федеролии Олмон дар Тоҷикистон Дорис Хертрампф мавриди баррасӣ қарор гирифт.               Оқил Оқилов аз сатҳи ҳамкориҳои ҳарду давлат дар соҳаҳои иҷтимоию техникӣ изҳори қаноатмандӣ карда, гуфт, ки боиси таассуф аст, ки дар бахши ҳамкориҳои иқтисодию энергетикӣ ҳанӯз аз имконоти мавҷудаи Тоҷикистону Олмон самаранок истифода бурда намешавад. «Мо хоҳони он ҳастем, ки аз ин баъд Олмон дар татбиқи лоиҳаҳои энергетикии Тоҷикистон, бахусус сохтмони НБО-и хурд, нерўгоҳҳои барқии бодӣ ва офтобӣ саҳми муносиб дошта бошад», тазаккур дод Сарвазир.             Ҳамзамон, Дорис Хертрампф таъқид кард, ки ба ҳайси сафир ҳама нерўю тавоноии худро баҳри ба сатҳи баланд расонидани муносибатҳои Тоҷикистону Олмон равона хоҳад кард.              Инчунин, дар ин мулоқот ба масъалаҳои ташкил ва бунёди корхонаҳои муштараки Тоҷикистону Олмон дар соҳаи саноати сабук, коркарди металлҳои кӯҳӣ, дармонгоҳҳои тиббии бо технологияи муосир муҷаҳҳаз ва муассисаи таълимӣ барои тарбияи мутахассисони соҳаи хизматрасонӣ бо ҷалби сармояи мустақими Ҷумҳурии Федеролии Олмон табодули назар карда шуд.