ПИЗИШКОНИ БЕҲТАРИНИ ҶУМҲУРӢ БА САФАР БАРОМАДАНД

              Душанбе, 13 феврал. (АМИТ «Ховар» Жасмин Назарова). Гурўҳи пизишкони беҳтарини ҷумҳурӣ барои гузаронидани муоинаи тиббии бинокорон ба сохтмони иншооти нерўгоҳҳои Сангтўда -1, Сангтўда — 2 ва Роғун сафарбар карда шуданд.              Тавре, ки аз дафтари матбуоти Вазорати тандурустии ҶТ ба АМИТ «Ховар» хабар доданд, бо супориши Вазири тандурустии кишвар Нусратулло Салимов, пизишкони варзидаи соҳаҳои гуногуни тиб, ба монанди табиби дандонпизишк, силшинос, уролог, табиби эндокринолог, иммунолог, табиби бемориҳои дарунӣ, чашмпизишк, табиби бемориҳои гўшу гулўю бинӣ, табиби бемориҳои асаб, акушер-гинеколог ва ғайра сохтмончиёнро муоина ва табобат хоҳанд намуд. Ҳайати табибон бо таҷҳизоти тиббии муосир, аз қабили дастгоҳҳои электрокардиограф, ултрасадо (УЗИ) ва дорувории зарурӣ таъмин карда шудаанд.               Ғайр аз ин, бо супориши Вазир ҳайати табибон бо 6 ҳазор дона ваксинаҳои зиддизуком барои эмкунии бинокорон таъмин карда шуданд. Фаъолияти пизишкон дар сохтмони иншоотҳои стратегии кишвар то 20-уми феврал идома хоҳад ёфт.