РАИСИ СОЗМОНИ САДО ВА СИМОИ ЭРОН БА ДУШАНБЕ МЕОЯД

                Душанбе, 16 феврал.(АМИТ «Ховар», Марзия Саидова).- 17 феврал Раиси Созмони Садо ва Симои Ҷумҳурии Исломии Эрон муҳандис, Сайид Изатулло Зарқомӣ бо даъвати Раиси Кумитаи радио ва телевизиони назди Ҳукумати ҷумҳурӣ ба Душанбе меояд. Дар ин бора ба хабарнигори АМИТ «Ховар» ёвари Раиси Кумитаи радио ва телевизиони назди Ҳукумати ҷумҳурӣ Толиб Холов иттилоъ дод.                Мақсади сафари Раиси Созмони Садо ва Симои Эрон ба Тоҷикистон тақвияти робитаҳои мутақобилан судманд байни ду кишвар дар бахши фаъолиятҳои радио ва телевизион мебошад.                Зимни сафари худ ба Душанбе Сайид Зарқомӣ бо Президенти Ҷумҳурии Тоҷикистон Эмомалӣ Раҳмон, Раиси Маҷлиси миллии Маҷлиси Олии ҷумҳурӣ, Маҳмадсаид Убайдуллоев, Мушовири давлатии Президенти ҷумҳурӣ Сайидмурод Фаттоев, вазири фарҳанги ҷумҳурӣ Мирзошоҳрух Асрорӣ ва Раиси Кумитаи радио ва телевизиони назди Ҳукумати ҷумҳурӣ Асадулло Раҳмонов мулоқот намуда, масъалаҳои тақвияти ҳамкориҳои судмандро дар бахши радио ва телевизион матраҳ менамояд. Интизор меравад, ки масъалаи ташкили шабакаи телевизони кишварҳои форсизабон, ки қароргоҳаш шаҳри Душанбе интихоб гардидааст, дар меҳвари мулоқотҳо хоҳад буд.                 Ҳамзамон, Зарқомӣ зимни сафари 5-рӯзаи худ ба Душанбе аз муассисаҳои давлатии телевизиони «Сафина», «Ҷаҳоннамо», телевизиони кӯдакону наврасон «Баҳористон», радиои Тоҷикистон ва «Шабакаи аввал»-и телевизони Тоҷикистон дидан намуда, бо фаъолияти ин муассисаҳо аз наздик шинос мешавад. Ӯ ҳамчунин дар барномаи «Пайванд»-и «Шабакаи аввал»-и телевизиони ҷумҳурӣ иштирок мекунад.                 Бояд зикр кард, ки байни Кумитаи радио ва телевизиони назди Ҳукумати Ҷумҳурии Тоҷикистон ва Созмони Садо ва Симои Ҷумҳурии Исломии Эрон дар солҳои 2002 ва 2007 Тафоҳумномаҳои ҳамкорӣ ба имзо расидааст, ки он ба рушди робитаҳои ҳасанаи ҳар ду кишвар мусоидат менамоянд.