СӮҲБАТИ РОҲБАРИ ҲАЙАТИ ХБА ДАР ТОҶИКИСТОН БО ХАБАРНИГОРОН

                  Душанбе, 6 феврал. АМИТ «Ховар», Темур Бандишоев). — Роҳбари ҳайати Хазинаи байналхалқии асъор дар Тоҷикистон Аксел Шиммелпфеннинг имрӯз баъди анҷоми мулоқоташ бо Президенти Ҷумҳурии Тоҷикистон Эмомалӣ Раҳмон дар бораи натиҷаҳои мулоқот ба журналистон хабар дод. Вай зикр намуд, ки бо хоҳиши Ҳукумати Тоҷикистон ҳайати хазина дар Душанбе ба кор шурӯъ намуд.                 «Мо ба Ҳукумати Тоҷикистон ва Бонки миллии мамлакати Шумо дар бобати андешидани тадбирҳои дахлдор дар соҳаи макроиқтисодӣ мусоидат менамоем, ки ҳадафи онҳо пешгирии таъсири манфии бӯҳрони ҷаҳонии молиявӣ ба иқтисодиёти Тоҷикистон мебошад», — гуфт А.Шиммелпфеннинг. Вай зикр намуд, ки коршиносони Хазина дар Тоҷикистон натиҷаҳои барномаи таҳқиқи масъалаҳои иқтисодиро ҷамъбаст менамоянд. Ин барномаҳо то охири соли 2008 иҷро карда шуданд. Ба қавли ӯ, натиҷаҳои пешрафти иқтисодии Тоҷикистон дар соли 2008 хеле хуб буданд.                   Ин аз бисёр ҷиҳат натиҷаҳои тадбирҳои сиёсати макроиқтисодӣ мебошад, ки Ҳукумат ва Бонки миллӣ дар амал татбиқ намуданд. Аз ҷумла, ҳаҷми истеҳсоли Маҳсулоти умумии дохилӣ 8 фоиз афзуд. Ба туфайли ин ба Ҳукумати Тоҷикистон муяссар гардид, ки маблағи буҷетро нисбати маблағи Маҳсулоти умумии дохилӣ як фоиз зиёд намояд. Илова бар ин дараҷаи беқурбшавии пул кам гардида, охири моҳи декабр 12 фоизро ташкил дод. Ба қавли роҳбари ҳайати ХБА, вазъият дар соли 2009 душвортар хоҳад гардид. Коҳиши дараҷаи пешрафти иқтисодиёти ҷаҳон ба Тоҷикистон низ таъсир хоҳад кард, гуфт вай.                   Айни ҳол пешгӯӣ карда мешавад, ки суръати афзоиши истеҳсоли Маҳсулоти умумии дохилӣ дар Русия коҳиш хоҳад ёфт. Вобаста ба ин ҳаҷми интиқоли пул ба Тоҷикистон то андозае кам мешавад. Ба мо маълум аст, ки вақтҳои охир нархи молҳои асосии содиротии Тоҷикистон — алюминий ва нахи пахта дар бозори ҷаҳонӣ хеле паст гардид. Қайд карда шуд, ки ҳайати ХБА дар Тоҷикистон ду ҳафта кор мекунад. Мутахассисон дар ин муддат ҳамроҳи коршиносони мақомоти расмии Тоҷикистон нақшаҳои иқтисодии соли 2009 -ро муҳокима карда, аз рӯи онҳо хулоса мебароранд.                   Роҳбари намояндагии ХБА изҳор намуд, ки дар мавриди зарурат тавассути Хазинаи байналхалқии асъор ба Тоҷикистон кӯмаки молиявӣ расонда хоҳад шуд. Вай зикр намуд, ки Ҳукумати Тоҷикистон ҳамаи вазифаҳои ба зимма гирифтаашро дар назди ХБА иҷро намуд. Ин моро дилпур месозад, ки ҳамкориро бо Тоҷикистон идома диҳем, гуфт дар хотима А.Шиммелпфеннинг.