САРБОЗОНРО БО ТӮҲФАҲО САРФАРОЗ КАРДАНД

                  Душанбе, 24 феврал. (АМИТ «Ховар», Сулаймон Холов). Бахшида ба 16 -умин солгарди артиши миллии Ҷумҳурии Тоҷикистон аз тарафи мақомоти иҷроияи ҳокимияти давлатии ноҳияи Мӯъминобод бо комиссариати ҳарбии қисми низомии 13483 ноҳияи Восеъ ҳамчун туҳфаи идона маводи хӯрока ба маблағи 2500 сомонӣ, аз ҷумла равған, биринҷ, обҳои нӯшокӣ, сабзавот ва дигар маводҳо тақдим карда шуд.                   Мудири шӯъбаи маънавиёти ноҳия Абдураҳим Зарифов дар сӯҳбат бо мухбири АМИТ «Ховар» гуфт, ки бахши ҷавонон, варзиш ва сайёҳии ноҳия низ ба 40 нафар сарбозон кӯмаки моддӣ расонданд.                  Мавриди зикр аст, ки аз тарафи ҷамоати деҳоти Кӯлчашма ба қисми ҳарбии 2931 деҳаи Шовуни ноҳияи Шӯробод низ маводи хӯрока ба маблағи 2000 сомонӣ тақдим карда шуд. Дар ҳамаи ин қисмҳои ҳарбӣ ҳамзамон ҷиҳати болидахотирии сарбозон базмҳои консертӣ ташкил карда шуданд.