ШУМОРАИ НАШЪАМАНДОН ДАР МАМЛАКАТҲОИ ОСИЁИ МАРКАЗӢ АФЗУД

               Душанбе, 23 феврал. (АМИТ «Ховар», Наргис Бояхмедова). — Аз рӯи маълумоти раёсати назорати маводи нашъадори СММ дар Осиёи Марказӣ, шумораи нашъамандон дар мамлакатҳои минтақа айни ҳол аз 280 ҳазор нафар ҳам зиёд аст. Дар Ӯзбекистон 130 ҳазор, дар Қазоқистон 100 ҳазор, дар Қирғизистон 26 ҳазор ва дар Тоҷикистон 23 ҳазор бемори нашъаманд ба қайд гирифта шудааст. Дар ин бора дар маълумоти роҳбари раёсати назорати маводи нашъадори СММ дар Осиёи Марказӣ Ҷеймс Каллахон сухан меравад.                Ба қавли ӯ, сабаби афзудани нашъамандон дар Осиёи Марказӣ ба он вобаста мебошад, ки мамлакатҳои минтақа бо Афғонистон ҳамсарҳад буда, қисми зиёди маводи нашъадори ин мамлакат ба воситаи қаламрави мамлакатҳои Осиёи Марказӣ интиқол дода мешавад. Соли 2007 дар мамлакатҳои Осиёи Марказӣ ҳамагӣ 98, 8 ҳазор нашъаманд ба қайд гирифта шуда буд.