ТОҶИКИСТОН ДАР СУРЪАТИ АФЗОИШИ МАБЛАҒГУЗОРӢ МИЁНИ КИШВАРҲОИ ИДМ ПЕШСАФ АСТ

                           Душанбе, 12 феврал. (АМИТ «Ховар», Бекназари Абӯбакр). — Ҷумҳурии Тоҷикистон аз рӯи суръати афзоиши маблағгузорӣ ба сармояи асосӣ соли дуввум аст, ки миёни кишварҳои ИДМ пешсаф боқӣ мемонад. Бино ба иттилои Кумитаи омори ИДМ дар соли 2008 ҳаҷми чунин намуди маблағгузорӣ дар Тоҷикистон нисбат ба соли 2007 ба андозаи 60 фоиз афзуд. Тамойили чунин афзоиш ба сохтмони иншооти гидроэнергеткӣ дар ҷумҳурӣ марбут дониста мешавад.                          Мавриди ёдоварист, ки Ҳукумати Тоҷикистон соли гузашта ҷиҳати маблағгузории 12 лоиҳаи муштараки инвеститсионӣ бо ташкилотҳои молиявии ҷаҳонӣ созишномаҳои навро ба имзо расонид, ки маблағи умумии онҳо 540 миллион сомонӣ буда, 315 миллион сомонии он қарзҳои бебозгашт мебошанд.                          Раиси Кумитаи давлатии сармоягузорӣ ва идораи амволи давлатии Тоҷикистон Фаррух Ҳавмралиев мӯътақид бар он аст, ки аз рӯи нишондодҳои шартномаҳо бо ташкилотҳои молиявӣ ва донорҳо соли ҷорӣ ҷалби сармояи мустақим ду маротиба афзуда, ҳавасмандии ширкатҳои хориҷӣ дар татбиқи лоиҳаҳои инвеститсионӣ низ вусъат дода хоҳад шуд.