УБАЙДУЛЛОЕВРО МИРКОЗИМӢ БА ЭРОН ДАЪВАТ КАРД

               Душанбе, 5 феврал. (АМИТ «Ховар», Марзия Саидова).- «Тоҷикистону Эрон, ки кишварҳои дӯсту ҳамзабонанд имкон доранд дар марҳилаи кунунии муносибатҳо аз иқтидори мавҷуда истифода намуда, дар низоми пешгирии оқибатҳои бӯҳрони молиявии ҷаҳонӣ барномаҳои муштараки иқтисодиро амалӣ намоянд». Чунин гуфт зимни мулоқоташ Раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев бо вазири бозаргонии Ҷумҳурии Исломии Эрон Сайидмасъуди Миркозимӣ, ки дар Душанбе қарор дорад.                Раиси палатаи болоии парлумони Тоҷикистон афзуд, ки ташрифи Шумо баҳри тақвияту тавсеаи татбиқи ташаббусҳои созандаи Сарони ҳар ду кишварҳо дар мавриди густариши робитаҳои мутақобилан судманди иқтисодию тиҷоратӣ нақши муҳим гузошта, дар таърихи муносибатҳои ҳасанаи Тоҷикистону Эрон саҳифаи навро боз хоҳад кард.               Дар ин ҷода парламенти ҳар ду кишвар тамоми тадбирҳоро пиёда месозанд, ки заминаҳо ва фазои ҳуқуқӣ ҷавобгӯи ҳамкории воқеан ҳасана ва қонунҳои давлатҳо дар ҳифзу амнияти сармоягузорӣ нақши муассир дошта бошанд, афзуд М. Убайдуллоев.              Вазири бозаргонии Эрон Сайидмасъуди Миркозимӣ гуфт, ки Ҷумҳурии Исломии Эрон ҷиҳати ҷалбу сафарбарии сармоягузорони эронӣ дар Тоҷикистон ҳамеша омодааст, то дар татбиқи лоиҳаҳои гидроэнергетикӣ, коркарди маъдан, истихроҷи нафту газ, ташаккули имкониятҳои технологияи муосир, рушди туризм ва коммуникатсия саҳмгузор бошад.               Зимнан таъкид дошт, ки Тоҷикистон метавонад дар мавриди ташкили минтақаҳои озоди иқтисодӣ таҷрибаи Эронро мавриди омӯзиш ва истифода қарор бидиҳад. Миркозимӣ гуфт, ки дар ин бахш бояд потенсиали парламентҳо истифода шуда нақши гурӯҳҳои дӯстии байнипарлумонии Тоҷикистону Эрон тақвият дода шавад.  Мавсуф аз номи Раиси Маҷлиси Шӯрои Исломии Ҷумҳурии Исломии Эрон М.Убайдуллоевро таклиф намуд, ки ҷиҳати тавсеаи робитаҳои байнипарлумонӣ ба Ҷумҳурии Исломии Эрон сафари расмӣ анҷом бидиҳад.