ҚОНУНИ НАВИ ОЗОДИИ ВИҶДОН ВА ИТТИҲОДИЯҲОИ ДИНӢ ҚАБУЛ ШУД

                    Душанбе, 6  март.(АМИТ «Ховар», Марзия Саидова).-5 март Маҷлиси намояндагони Маҷлиси Олии ҷумҳурӣ Қонуни Ҷумҳурии Тоҷикистон «Дар бораи озодии виҷдон ва иттиҳодияҳои динӣ»-ро қабул кард.                     Масъалаи мазкурро вазири фарҳанги ҷумҳурӣ Мирзошоҳрух Асрорӣ тавзеҳ дода гуфт, ки қабули қонуни нав дар шароити кунунӣ зарурати ҳаётӣ ва тақозои давру замон аст. Он татбиқи сиёсати ягонаи давлатро дар бахши озодии виҷдон, эътиқодӣ динӣ, муҳаё сохтани фазои озодии виҷдон ва эътиқод, аз ҷумла андешаи диниро таъмин менамояд.                   Таҳияи қонуни мазкур ду сол қабл оғоз гардида, он бо иштироки табақаҳои гуногуни ҷомеаи Тоҷикистон ва созмонҳои байналмилалии ҳифзи ҳуқуқи башар муҳокима шуд.                    Бояд тазаккур дод, ки қонуни мазкур ҳанӯз 18 сол муқаддам, аниқтараш 8 декабри соли 1990 қабул гардида буд. Аз ин рӯ, дар ин муддат дар ҳаёти сиёсию иқтисодӣ ва иҷтимоию фарҳангии мамлакат дигаргуниҳои куллӣ ба вуҷуд омад, хусусан дар фазои андешаи динии кишвар.Дар ин давра Ҷумҳурии Тоҷикистон ба раванди ҷаҳонишавӣ ворид гардид.                   Қонуни мазкур аз 8 боб ва 36 модда иборат буда, давлати дунявӣ будани Тоҷикистонро инъикос менамояд.  Моддаи чори қонун тартиби бақайдгирии иттиҳодияҳои динӣ ва моддаи 11 бошад ташкили масҷидҳои ҷомеъ ва панҷвақтаро дар бар мегирад. Алҳол, дар ҷумҳурӣ 259 масҷиди ҷомеъ, 2983 масҷидҳои панҷвақта ва 18 ташкилоти динӣ фаъолият менамояд, ки аз озодии виҷдон ва фаъолияти густурдаи иттиҳодияҳои динӣ дар кишвар шаҳодат медиҳанд.