ҶАСАДИ ДУ ТИФЛИ БЕГУНОҲ

                    Душанбе, 11 март. (АМИТ «Ховар», Жасмин Назарова). — Тахминан соати 21, рӯзи 7 марти соли равон ба шӯъбаи корҳои дохилии ноҳияи Шоҳмансур дар бораи дарёфти ҷасади ду тифли навзод дар кӯчаи Аҳмади Дониш хабар расид.                     Тавре ба АМИТ «Ховар» аз дафтари матбуоти Вазорати корҳои дохилии Ҷумҳурии Тоҷикистон иттилоъ доданд, ба ҷои ҳодиса гурӯҳи фаврӣ-тафтишотӣ бо роҳбарии сардори шӯъбаи корҳои дохилии ноҳияи мазкур полковники милитсия Хушбахт Шарипов ҳозир шуданд. Дар даромадгоҳи истиқоматии №20 /4, ошёнаи якуми кӯчаи Аҳмади Дониш дар қуттии қоғазӣ ҷасадҳои ду тифли навзоди ҷинсашон зан дарёфт карда шуд.                    Дар натиҷаи гузаронидани корҳои фаврии ҷустуҷӯӣ муайян карда шуд, ки шаҳрванд Дилором Сайфова, соли таваллудаш 1973, коргари шароббарории Ҷамъияти саҳомии корхонаи шаҳри Душанбе модари ҷасадҳои дарёфгардида буда, пас аз таваллуд кардан тифлҳоро ба қуттии қоғазӣ андохта ба ҷои зикргардида бурда партофтааст. Ҷасадҳо барои муайян кардани сабаби марг ба беморхона барои ташхис супорида шуданд. Нисбати ин ҳодиса парвандаи ҷиноӣ кушода шуд ва тафтишоти он идома дорад.