БАХШИДА БА ИДИ ЗАНОН

                    Хоруғ, 6 март. (АМИТ «Ховар», Л. Додо).-Дар толори маҷлисгоҳи Донишгоҳи давлатии шаҳри Хоруғ бахшида ба иди байналмиллалии занон вохӯрии фаъолзанони вилоят бо донишҷӯдухтарони Донишгоҳ баргузор гардид. Дар ҷамъомад бонувоне, ки нерӯи созандаю бунёдкоронаи хешро баҳри Рушду шукуфоии ҷомеа бахшидаанд, ширкат варзиданд. Шоири халқии Тоҷикистон Ширин Бунёд доир ба қадру манзалати зан, чун олиҳаи ишқу зебоӣ, ва бахшандаи ҳаёт дар рисолати азалии ӯ — тавлиду тарбияи фарзанд, ибрози ақида намуда, иброз дошт, ки ҳастии мо аз зан вобаста аст.                    Собиқ раисони шаҳри Хоруғ Гулбибӣ Мулкамонова, Анҷирбегим Мақбулшоева, раиси Кумитаи кор бо занон ва оилаи ВМКБ Арамбегим Маҳтобшоева, шоираи ҷавон Гулнисои Атоӣ аз мақому манзалати зан дар пешрафти ҷомеа хеле самимӣ ҳарф заданд.