БАРНОМАҲОИ ИДОНАИ НАВРӮЗӢ

                        Душанбе, 16 март. (АМИТ «Ховар», Лутфия Эшонқулова).- Филармонияи давлатии Тоҷикистон ба номи А. Ҷӯраев бахшида ба ҷашни Наврӯз силсилаи тадбирҳои идонаро ба нақша гирифтааст.                        Аз ҷумла, 21 март дар Варзишгоҳи марказии ҷумҳуриявӣ барномаи калони консертии идона бо иштироки ҳунармандони шоистаи ҷумҳурӣ — Ҷумъахон Сафаров, Файзигул Юсуфова, Раҷаббой Идиев, Сӯҳроби Маҳмуд ва дастаҳои рақсии «Ганҷина» ва «Чаман» баргузор мегардад.                      Аз маркази матбуотии Вазорати фарҳанги ҶТ ба мухбири АМИТ «Ховар» хабар доданд, ки 22 март дар «Кохи Ваҳдат» ҳунарманди шоистаи ҷумҳурӣ Сӯҳроби Маҳмуд барои мухсилони худ барномаи консертиро пешкаш менамояд. Дар толори Филармония гузаронидани барномаи консертии Шӯҳрат Сайнаков ба нақша гирифта шудааст.                     Ҳамчунин, ҳамон рӯз дар ноҳияи Қумсангир ҳунармандони шинохта Ҳаётой Муминова ва Сафаргул Юсуфова ба муносибати иди баҳор барномаи махсуси консертӣ намоиш дода, дили мухлисонро шод хоҳанд намуд.