БАРРАСИИ ПРОБЛЕМАҲОИ БӮҲРОНИ ҶАҲОНИИ МОЛИЯВӢ ДАР ЮНЕСКО

                    Душанбе, 2 март (АМИТ «Ховар», Наргис Бояхмедова). — Имрӯз дар қароргоҳи марказии ЮНЕСКО дар Париж бахшида ба нақши Созмони Милали Муттаҳид дар бобати пешгирии оқибатҳои ногувори бӯҳрони ҷаҳонии молиявӣ конфронси байналхалқӣ баргузор гардид. Намояндагони мамлакатҳои аъзои созмон ва коршиносон аз он изҳори ташвиш менамоянд, ки бӯҳрони ҷаҳонии молиявӣ сабаби барбод рафтани кӯшишҳои чандинсолаи СММ дар соҳаҳои паст кардани сатҳи камбизоатӣ, беҳтар сохтани саломатии мардум, дастраси ҳамагон гардондани таҳсил, баробарҳуқуқии зану мард ва пешрафти иқтисодиёти мамлакатҳои қашшоқ гардида метавонад.                     Иштирокчиёни конфронс ба нақши СММ ва ЮНЕСКО дар масъалаҳои гузоштани маблағҳои иловагӣ ба соҳаҳои илм, маориф ва фарҳанг дар давраи бӯҳрони молиявӣ диққати махсус доданд.                     Мухбири АМИТ «Ховар» хабар медиҳад, ки дар конфронси мазкур коршиносони муассисаҳои соҳавии СММ, намояндагони муассисаҳои молиявии байналхалқӣ, созмонҳои мададрасон, байниҳукуматӣ ва ғайриҳукуматӣ, инчунин, ходимони маъруфи давлатию ҷамъиятӣ ширкат варзиданд.