БИНОҲОИ 4 ВА 5-И СИЛСИЛАБИНОҲОИ «ПОЙТАХТ-80» БА ИСТИФОДА ДОДА МЕШАВАД

                   Душанбе, 30 март.(АМИТ «Ховар», Марзия Саидова).-Масъалаи ба комиссияи давлатии қабул оид ба истифодабарӣ тайёр намудани биноҳои 4 ва 5 -уми силсилабиноҳои маҷмааи манзилии «Пойтахт-80» зимни мулоқоти Раиси шаҳри Душанбе Маҳмадсаид Убайдуллоев бо муовини сардори Департаменти сохтмонии шаҳри Москва Дмитрий Коробов баррасӣ шуд.                   Зимни мулоқот мусоҳибон ҳамчунин оғози корҳои сохтмониро дар биноҳои 2 ва 3-юми ин иншоот баррасӣ карданд.                  Маҳмадсаид Убайдуллоев гуфт, ки баъди аз ҷониби фармоишгари иншоот ҶММ «Жилкапинвест» ба анҷом расонидани корҳои сохтмонӣ дар биноҳои 4 ва 5-ум тибқи талаботи санадҳои меъёрии ҳуқуқии Ҷумҳурии Тоҷикистон роҳбарияти шаҳри Душанбе имкон дорад, ки санади марбутаро доир ба таъсиси комиссияи давлатии қабул ба имзо расонад.                 Дар мулоқот ҷиҳати назорат ва вусъати корҳои сохтмонӣ дар иншоот тибқи муқаррароти мақомоти иҷроияи ҳокимияти давлатии шаҳри Душанбе гурӯҳи кории муштарак таъсис дода шуд.