ДАР ИДИ НАВРӮЗ ЯК ҲАФТА ИСТИРОҲАТ МЕКУНЕМ

                      Душанбе, 17 март (АМИТ «Ховар», Таҳмина Ғоибназарова). — Сокинони Тоҷикистон ба муносибати таҷлили иди Наврӯз мувофиқи Конститутсияи ҷумҳурӣ, аз 21 то 24 март, яъне 4 рӯз истироҳат мекунанд. Аз ин рӯзҳо 21 ва 22 март ба рӯзҳои истироҳат рост меоянд. Бинобар ин ҳамчун рӯзҳои истироҳат ба 26 ва 27 март гузаронидани ин рӯзҳо ба салоҳияти роҳбарони корхонаю муассисаҳо гузошта шудааст. Рӯзҳои иди Наврӯз дар шаҳру ноҳияҳои мамлакат сайру гаштҳои оммавӣ, намоишу ярмаркаҳо ва консертҳо баргузор мегарданд.                        Мухбири АМИТ «Ховар» хабар медиҳад, ки дар шаҳри Душанбе аз 21 то 23 март дар варзишгоҳҳо намоишҳои театрикунонидашуда гузаронида хоҳанд шуд. Дар барномаҳои консертӣ ҳунарпешагони варзида иштирок менамоянд. Инчунин, барои ҳаводорони варзиш мусобиқаҳои гуногуни варзишӣ ташкил карда хоҳанд шуд.