ДАР СУҒД РЎЗИ МАТБУОТРО БО ТАНТАНА ТАҶЛИЛ МЕКУНАНД

                 Душанбе, 4 март. (НИАТ «Ховар», Бекназари Абӯбакр). — Дар доираи таҷлили Рўзи матбуоти тоҷик, ки дар кишвар 11 март таҷлил мегардад, мулоқоти раиси вилояти Суғд Қоҳир Расулзода бо журналистони вилоят дар назар аст.                  Аз маркази иттилоот ва таҳлили дастгоҳи раиси вилоят ба АМИТ «Ховар» иттилоъ доданд, ки дар ин бобат раиси вилоят қарори дахлдорро ба имзо расонд.                  Мувофиқи ин санад 11-марти соли ҷорӣ дар қаламрави вилоят Рўзи матбуоти тоҷик бо тантана таҷлил карда мешавад.                  Раиси вилоят бо қарори мазкур раисони шаҳру навоҳии вилоятро вазифадор намудааст, ки иди касбии рўзноманигорон ва кормандони муассисаҳои табъу нашрро дар сатҳи баланд ташкил намуда, барои дастгирии моддию маънавии нашрияҳои маҳаллӣ, рўзноманигорон, кормандони матбааҳо, собиқадорони матбуот, тадбирҳои зарурӣ андешанд.                 Тибқи нақшаи чорабиниҳо, интизор меравад, ки ба ин муносибат озмуни вилоятӣ миёни журналистони ҷавон таҳти унвони «Хомаи заррин», иншои беҳтарин дар мавзўи «Ваҳдат ва рушди ҷомеа» ва мусобиқаи дави умумӣ баргузор гардад.