ДАР ТОҶИКИСТОН ДУ МИНТАҚАИ ОЗОДИ ИҚТИСОДӢ МУАРРИФӢ ГАРДИД

                   Душанбе, 18 март. (АМИТ «Ховар», Покиза Маҳмадбекова). — Дар Вазорати рушди иқтисод ва савдои Ҷумҳурии Тоҷикистон муаррифии ду минтақаи озоди иқтисодӣ — «Суғд» ва «Панҷ» баргузор гардид.                    Муовини вазири рушди иқтисод ва савдои ҷумҳурӣ Лариса Кислякова дар оғози муаррифии ин минтақаҳои озоди иқтисодӣ қайд намуд, ки ҳадаф аз ташкили онҳо ҷалби бештари сармоягузорони хориҷӣ ба ҷумҳурӣ мебошад. Ҳукумати чумҳурӣ барои таъсиси минтақаи озоди иқтисодии «Суғд» дар Хуҷанд 320 гектар замин ва 400 гектар замин дар вилояти Хатлон ба муддати 25 сол ҷудо намудаст. Ҳоло маъмурияти муасcисаҳои минтақаҳои озоди иқтисодӣ аз ҷониби ҳукумат ташкил шуда, роҳбарони онҳо таъин шуданд.                    Маврид ба зикр аст, ки ҳар ширкати дохилӣ ва хориҷӣ, ки ҳаҷми сармоягузориаш аз 500 ҳазор доллари амрикоӣ кам нест, метавонад бо дархост аз маъмурияти минтақаҳои озоди иқтисодӣ ба муддати ҳади ақал се сол барои анҷом додани корҳои тавлидотӣ ва тиҷоратӣ дар ин манотиқ соҳиби замин шавад. Ширкатҳое, ки дар минтақаҳои озоди иқтисодӣ дорои иҷозатнома барои фаъолият мешаванд, ба ҷуз андоз аз музди кори кормандон аз пардохти кулли андозҳо ва боҷи гумрукӣ ба муддати ҳафт сол озод мебошанд.                    Л. Кислякова афзуд, ки сармоягузорони хориҷӣ дар минтақаҳои озоди иқтисодӣ ҳуқуқ пайдо мекунанд, то ҳар фаъолияте, ки қонунгузории Тоҷикистон манъ накардааст, анҷом диҳанд.                    Ёдовар шудан ба маврид аст, ки манотиқи озоди иқтисодии «Суғд» ва «Панҷ» дар кишвар ягона набуда, дар ояндаи наздик чунин минтақаҳо дар ноҳияи Данғара ва дар ноҳияи Ишкошим низ ташкил хоҳанд шуд.