ДОНИШҶӮЁНИ ТОҶИК ДАР ДОНИШГОҲИ БУНИНИ РУСИЯ ТАҲСИЛ МЕНАМОЯНД

                Душанбе, 3 март.(АМИТ «Ховар», Марзия Саидова).-Ҳамкории мутақобилан судманди Ҷумҳурии Тоҷикистон бо Федератсияи Россия беш аз пеш густариш меёбад. Далели ин ба имзо расонидани Созишнома байни Вазорати маорифи Ҷумҳурии Тоҷикистон ва Донишгоҳи давлатии ба номи И.А. Бунини шаҳри Елетскийи Федератсияи Россия мебошад.                 Мақсади ба имзо раоснидани Созишномаи мазкур таҳкими хамкориҳои судманд дар соҳаи илм ва маориф аз ҷумла, иҷрои «Қарордод оид ба ҳамкорӣ ҷиҳати таъсиси фазои ягонаи таҳсилоти давлатҳои аъзои Иттиҳоди Давлатҳои Мустақил» мебошад, гуфт дар сӯҳбат ба хабарнигори АМИТ «Ховар» сардори Маркази матбуоти Вазорати маорифи ҷумҳурӣ Ноилшо Нуралиев.                Тибқи ин созишнома ҷонибҳо ба мувофиқа расиданд, ки хатмкунандагони муассисаҳои таҳсилоти умумии Ҷумҳурии Тоҷикистон , ки бо забони русӣ озод сухан мегӯянд, дар асоси озмун метавонанд, бо ихтисосҳои гуногуни техникӣ, педагогӣ, ҳуқуқшиносӣ, таърих, иқтисодӣ, филологӣ, кишоварзӣ, ки номгӯи онҳо 37-тоанд, таҳсил намоянд. Донишҷӯёни муассисаҳои олии касбии Ҷумҳурии Тоҷикистон таҷрибаомӯзии худро дар таътили тобистона тибқи муқаррарот дар риштаи шевашиносӣ ва эҷодиёти шифоҳӣ (фолклор) мегузаронанд.                 Ҳамзамон, Донишгоҳ дар зинаи магистратура донишҷӯёни муассисаҳои олии касбии Тоҷикистонро ба ихтисоси ҳуқуқшиносӣ, физика-математика, филолог ва педагогика қабул мекунад. Аспирантон ва докторантон низ таҳсилро дар Донишгоҳи давлатии ба номи И. А. Бунин вобаста ба ихтисосҳо идома дода, рисолаҳои худро тибқи талаботи Комиссияи олии аттестатсионии Федаратсияи Россия дифоъ менамоянд.