ДУШАНБЕ СОҲИБИ ХАРИТАИ ЭЛЕКТРОНӢ МЕШАВАД

                       Душанбе, 11 март.(АМИТ «Ховар», Марзия Саидова).- Дар ояндаи наздик дар пойтахт системаи нав — насби дастгоҳҳои назоратӣ, ки дорои камера ва экранҳоянд ба роҳ монда мешавад. Тибқи иттилои муовини Раиси шаҳри Душанбе Абдуҳомид Шералиев, алҳол мутахассисони ширкати «Хуавей»-и Ҷумҳурии Мардумии Чин корро дар ин самт шурӯъ карданд.                        Мақсад аз роҳандозии системаи нав, яъне харитаи электронӣ ин назорат кардани воситаҳои нақлиёт, ба қайд гирифтани самти ҳаракати онҳо, инчунин идоракунии системаи хизматрасонӣ ва танзими нақлиёти ҷамъиятӣ дар пойтахт буда, он ба таъмини бехатарӣ дар пойтахт ва ҳаракати пиёдагардон мусоидат менамояд.                        Маркази идоравии камераҳои назоратиро операторон, ки аз зумраи мутахассисони ботаҷрибаанд, идора менамоянд.                       Абдуҳомид Шералиев меафзояд, ки Барномаи мазкур дар давоми ду сол дар асоси Шартномаи ҳамкорӣ байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин амалӣ гардонида мешавад. Бояд тазаккур дод, ки ба роҳ мондани чунин системаи нави электронӣ талаботи ҷомеаи муосир ва мутамаддин буда, таҷрибаи баъзе кишварҳои Аврупоӣ ва Осиёӣ аз ҷумла, Чин ва Ҷопон истифода мешавад.