ФАЪОЛИЯТИ АГЕНТИИ РУШДИ БАЙНАЛХАЛҚИИ ИМА ДАР ТОҶИКИСТОН ВУСЪАТ МЕЁБАД

                    Душанбе, 30 март. (АМИТ «Ховар», Наргис Бояхмедова). — Ба оғози фаъолияти Агентии рушди байналхалқии ИМА дар Тоҷикистон 15 сол пур шуд. Фаъолияти он дар Тоҷикистон соли 1992 оғоз ёфта буд, соли 1993 дар шаҳри Душанбе намояндагии Агентӣ кушода шуд. Халқи Амрико аз ҳамон солҳо сар карда, ба воситаи барномаҳои гуногун барои рушди соҳаҳои гуногуни иқтисодиёти Тоҷикистон, аз ҷумла, тандурустӣ, маориф ва сохторҳои демократӣ зиёда аз 300 миллион доллар ҷудо намуд. Илова бар ин барои бартараф сохтани оқибатҳои ҷанги дохилӣ ва фалокатҳои гуногуни табиӣ кӯмакҳои хайрия расонда шуданд.                   Сафири кабири ИМА дар Тоҷикистон Трейси Энн Ҷейкобсон ба мухбири АМИТ «Ховар» гуфт, ки фаъолияти агентӣ айни ҳол ба вусъат бахшидани ҷараёни ислоҳот дар мамлакат, беҳтар намудани шароити тиҷорату сармоягузорӣ, густариши фаъолияти худидоракунии маҳаллӣ, дастгирии маориф, истифодаи таҷрибаи мусбати соҳаи тандурустии байналмилалӣ, пешгирии бемориҳои вазнин ва ғайра равона шудааст.                    Буҷети агентӣ дар Тоҷикистон соли 2010 ба 45 миллион доллари ИМА мерасад, ки нисбат ба буҷети мамлакатҳои дигари минтақа зиёд аст, гуфт сафир.