ФУРАҲО ВА ХИСОРОТИ ПУЛУ РОҲҲОИ БАДАХШОН

                    Хоруғ, 18 март. (АМИТ «Ховар», Л. Додо). — Бо ифтитоҳ гардидани шоҳроҳи Мурғоб-Кулма ба ҷумҳурӣ на танҳо мошинҳои КАМАЗ-у тамғаҳои ба он монанд, балки мошинҳои вазнин ҳам ворид мегарданд. Аз як тараф ин амали хубест, зеро соҳибкор ба ҷои 10 мошин аз як мошин истифода мебарад.                    Ҳамзамон, дар баробари ҷиҳатҳои мусбат доштанаш ин масъала тарафи манфӣ низ дорад. Зеро аксари пулҳое, ки дар даврони Шӯравӣ сохта шуда буданд, иқтидори бардошташон аз 18 то 30 тонна аст. Автомобилҳои боркашон бошад хеле вазни гарон дорад.                     Сардори корхонаи «Бадахшонроҳ» Шамсиддин Назриев дар сӯҳбат бо мухбири АМИТ «Ховар» иттилоъ дод, ки мувофиқи қоида мошинҳои калонҳаҷм бояд танҳо то Мурғоб ва деҳаи Танги ноҳияи Шуғнон ҳаракат кунанду халос, аммо ба хотири амалӣ гардидани барномаҳои роҳсозии Душанбе-Чаноқ, Душанбе-Ҷиргатол, хатти барқи Лолазор ин мошинҳо ҳудуди ВМКБ-ро убур мекунанд. Ин дар роҳҳову дар пулҳо хисороти зиёдеро ба бор овардааст. Танҳо соли 2008 пули ноҳияи Ванҷ ба маблағи 443 ҳазор сомонӣ таъмир гардид. Соли ҷорӣ низ бо ин мақсад маблағи зиёде ҷудо шудааст.                     «Бояд тазаккур дод, ки ҳар қадар, ки таъмир кунем ҳам, пуле ки барои 18 тонна бор бунёд гардидааст, вазни 60-70 тоннаро бардошта наметавонад. Аз ин рӯ, роҳи ҳалли ин масъала ба ҷуз дар деҳаи Танги ноҳияи Шуғнон бори ин мошинҳои калонро ба мошинҳои дигари нисбатан хурдтар бор кардан, илоҷи дигар нест, то роҳҳо ва пулҳои ҳудуди Бадахшон обод монанд», — гуфт дар хотима Ш. Назриев.